Jul 28, 2025 | 10:12 Yeni nəşrlər
AMEA-nın Memarlıq və İncəsənət İnstitutunun İncəsənətin qarşılıqlı əlaqələri şöbəsinin aparıcı elmi işçisi kulturologiya üzrə fəlsəfə doktoru, dosent Yeganə Əliyevanın “Müasir Şərqin mədəniyyətlərarası dialoq modellərinin alternativliyi və kulturoloji təfəkkürünün paritetliliyi” adlı elmi məqaləsi Azərbaycan Respublikası Prezidenti yanında Ali Attestasiya Komissiyasının tövsiyə olunan dərgilər siyahısında yer alan, İndex Citation “Musiqi dünyası” Beynəlxalq Elmi Musiqi Jurnalının Vol.27, №2(103), 2025-ci il buraxılışında dərc olunub (DOİ: https://doi.org/10.5281/zenodo.16052049).
Tədqiqatın məqsədi XXI əsrdə mədəni dəyərlərin qlobal transformasiyası fonunda makroregionlar, o cümlədən Azərbaycan daxil olmaqla Türk dünyası üzrə Şərq intellektuallarının kulturoloji refleksiya meqatendensiyalarının icmal şərhini verməklə, Şərqin təklif etdiyi qlobal mədəni dialoq modellərinin Qərbin kulturoloji təfəkkürünə nisbətdə alternativ və paritet olduğunu müəyyən etməkdir.
Məqalədə ilk dəfə olaraq Şərqin mədəniyyətlərarası dialoq modelinin alternativliyi və kulturoloji təfəkkürünün paritetliliyi nəzəri konsept kimi təqdim olunur. Tədqiqatın nəzəri əhəmiyyəti kulturogiya elmi bilik sahəsinə yeni anlayışlar aparatının zənginləşdirilməsinə xidmət edir. Tədqiqatın praktiki əhəmiyyəti mədəniyyət tarixi və nəzəriyyəsi, xüsusilə də Şərq sivilizasiyaların bədii mədəniyyətinin tədrisinə həsr olunan mühazirələrdə istifadə oluna bilər. Bundan başqa, humanitar siyasətin, mədəniyyətlərarası layihə və dialoq platformalarının hazırlanmasında tətbiq edilə bilər.
Məqalə ilə “Musiqi dünyası” jurnalının və AMEA Mərkəzi Elmi Kitabxanasının saytında tanış ola bilərsiniz.
www.science.gov.az
